ناقابل تلافی

اردو کی کچھ غلطیاں قابلِ معافی نہیں قابلِ تلافی ہوتی ہیں ۔ 

ایک پوسٹ نظر سے گزری جس پر لکھا تھا۔  

" دوستوں کے ساتھ فحش پارٹی " ساتھ  تصاویر بھی تھیں،  فحاشی کی بجائے بُھنی ہوئی مچھلی نظر آ رہی تھی تو اندازہ یہی لگایا کہ موصوف  " فِش پارٹی " لکھنا چاہ رہے تھے ۔ 

ایک شادی کی تصویر کے نیچے لکھا تھا " اللہ آپ کا سواگ قائم رکھے " یقیناً ذہن میں " سہاگ" ہی ہوگا۔

 کئی طالب علم  علامہ اقبال پر مضمون لکھتے ہوئے آغاز ہی" شاعرِ مشرک " سے کرتے ہیں۔  

آج بھی کئی نیم خواندہ محرر  FIR میں "  دفع 140 " ہی لکھتے ہیں سوچتی ہوں ان کے مجرم مفرور نہیں دفعان ہوجاتے ہوں گے ۔ 

کچھ لوگ انگریزی کو اردو کرنے کے چکر میں مارے جاتے ہیں ۔ ایک نیم پڑھے لکھے صاحب نے ایک خاتون کو  متاثر کرنے کے لیے اردو رسم الخط میں گلہ کیا،

" میں نے آپ کو کئی بار مساج کیا لیکن آپ نے کبھی مجھے جوابی مساج نہیں کیا۔۔۔"   اصل میں وہ تو " Message " ہی لکھنا چاہ رہے تھے ۔ یہ تو خاتون ہی وفا کو دغا پڑھتی رہیں۔

کچھ غلطیاں صرف فاش ہی نہیں فحش بھی ہوتی ہیں۔😃 

آصفہ عنبرین قاضی

۔۔۔۔۔۔۔۔۔۔۔۔۔۔